Suni tekur samanum #3: Hondbóltsrisin Norra

Suni tekur samanum #3

Nógv harðari mótstøða fæst ikki í EM-endaspælinum enn móti hondbóltsrisanum Norra.

Norðmenn vera roknaðir millum favorittarnar. Úrslitini tala fyri seg. Norra var í HM-finaluni bæði í 2017 og 2019, og vóru nummar trý í EM-endaspølunum í 2016 og 2020.

Norska manslandsliðið er tí so smátt farið at taka kappingina upp við norska kvinnulandsliðið, sum hevur verið best í øllum endaspølum nú í fleiri ár. Venjarin, Jonas Wille, hevur allar sínar kosnu menn tøkar til hetta endaspælið, eingin skaði ella annað avboð hevur verið.

Føroyingar vekja ans í Norra

Søgan um føroyska EM-landsliðið hevur eisini vakt ans í Noregi. Allir fjølmiðlar skriva um liðið við mannsterku viðhaldsfjøldini, ið telur útivið tíggju prosent av landsins íbúgvum. Fjølmiðlarnir dusa sær í søgunum um, at so góðir spælarar kunnu alast upp í so lítlum samfelag, at fleiri av føroysku spælarunum eru nær skyldir, at mamman at hinum kendasta er forkvinna í Hondbóltssambandinum, og at pápin er knýttur at liðnum sum ráðgevi í ítróttarsálarfrøði.

Kennskapur er eisini millum spælarar. Fleiri av føroysku spælarunum spæla ella hava spælt í Noregi, eisini saman við spælarum á norska liðnum, so her valdar vinskapur. Og Elias á Skipagøtu hevur tveir av norðmonnunum sum liðfelagar í týska stórfelagnum Kiel, annar - Harald Rheinkind - er kamarfelagi, tá teir ferðast til dystir í útlondum.

Føroyingum er greitt, at Norra er besta liðið í okkara bólki. Men av tí at munurin var so lítil í dystinum móti Slovenia hósdagin, eru kanska grundaðar vónir um, at vit kunnu fáa ein góðan dyst móti norðmonnum.

Við yvirlutan á áskoðarapássunum

Føroysku áskoðararnir verða ikki færri í kvøld enn hósdagin. Okkurt flogfar er komið aftrat úr Føroyum til Berlin, summi ferðast eisini úr Danmark. Meginparturin av føroyingunum búgva í størsta hotellinum í Berlin, og har er sum á ólavsøku hvønn dag, frætta vit, sum búgva aðrastaðni.

Øll eru vónrík og spent, um okkara dreingir eru mentir at geva einum av heimsins bestu hondbóltsliðum dygga mótstøðu í kvøld. Vit eru við yvirlutan, tá dysturin byrjan - á áskoðaraplássunum. Tann stuðulin er ikki at forsmáa, og kann muna væl, tá mótsøðan verður so stór, sum hon verður í kvøld.