Jóhan fylgir føroyingunum

Jóhan á Plógv Hansen heldur eyga við, hvussu tað gongur hjá føroyska landsliðnum í EM-endaspælinum.

Føroyingurin á danska hondbóltslandsliðnum fylgdi við, tá Føroyar taptu við trimum fyri Slovenia í sínum fyrsta EM-dysti yvirhøvur, eftir at sensatiónin hótti tíðliga í seinna hálvleiki, tá føroyingarnir vóru frammanfyri við tveimum.

 - Tað var spell, at tað ikki helt. Tað hevði verið stuttligt, um teir høvdu fingið eitt stig, segði Jóhan á Plógv Hansen við TV 2 Sport.

 - Eg kenni fleiri av føroysku spælarunum og venjaran, so tað er ótrúliga stuttligt at síggja, hvussu eitt so lítið land kann gera seg galdandi á EM-pallinum.

Jóhan á Plógv Hansen hevur vunnið trý HM-gull síðan 2013, tá hann fór at spæla við danska landsliðnum.

Føroyar spæla ímóti Norra leygarkvøldið og Póllandi mánadagin, og Jóhan á Plógv Hansen, sum spælir við Flensburg-Handewitt í bestu týsku deildini, vónar, at tað fer at ganga væl hjá Føroyum.

 - Eg ivist ikki í, at Føroyar kunnu arga í hesum báðum dystunum, sigur vongurin við TV 2 Sport.

Danmark vann sín fyrsta EM-dyst 23-14 á Kekkia.