Finnlendingar skulu læra at skjóta

Í Finnlandi er ætlanin at lata upp fleiri enn 300 skjótibreytir. Tað skal gerast fyri at fáa fleiri finnlendingar at læra seg at skjóta.

Finnland gjørdist limur í NATO í fjør. Landamarkið millum Finnland og Russland er heili 1330 kilometrar.

- Tað er ein stórur fyrimunur fyri okkara verju, at fólk sjálvi læra seg at skjóta, sigur Jukka Kopra, formaður í verjunevndini hjá finska tjóðartinginum. 

Finnland hevur eina drúgva siðvenju við skjótibreytum. Um aldarskiftið vóru umleið 2.000 skjótibreytir í Finnlandi, nú eru bara 670 eftir.

Men síðani russisku innrásina hava alsamt fleiri finnlendingar søkt um vápnaloyvi, og tilboðini um vápnaskeið av ymsum slag eru tvífaldað, skrivar blaðið The Guardian.