Ávirkanin frá alingini á fiskastovnarnar verður nú kannað

Nú verður kannað, um alingin í Føroyum ávirkar fiskastovnarnar.

Uttanríkis- og vinnumálaráðið, Fiski- og Samferðslumálaráðið, Havstovan og Firum hava tikið stig til eina verkætlan, sum vónandi kann greina neyvari, um samband er millum alivirksemið og fiskastovnarnar undir Føroyum.

Tað segði Høgni Hoydal, landsstýrismaður, tá hann setti aliráðstevnuna fríggjadagin.

Hann segði, at tað er av allarstørsta týdningi at fáa eina greiðari mynd av, hvørja ávirkan alivinnan hevur á vistskipanina, á onnur fiskasløg og umhvørvið kring okkum.

- Tað er tí mín greiða ætlan, at gransking, skjalfesting og vitan á hesum økjum fara at fáa munandi hægri raðfesting, segði landsstýrismaðurin.