Hendingin hevur sett síni spor

Ein øgiliga tung tíð.

Hesi orðini lýsa best støðuna, sum Susi og Jákup á Borg vóru í fyri skjótt tveimum árum síðani.

Tann tá tvey ára gamli sonurin, Sigurð, hevði verið illa fyri í langa tíð, hevði onga orku og át næstan einki. Nógvar kanningar blivu gjørdar, men tað var trupult at finna útav, hvat lítla dronginum bagdi. 

Men ein dag í juni 2022 skuldu Susi og Jákup á Landssjúkrahúsið fyri at hoyra um úrslitið av mongu kanningunum. Ein samrøða, sum broytti alt.

- Tá fáa vit at vita, at royndirnar vísa, at Sigurð hevur blóðkrabba, og at vit skulu niður dagin eftir á Ríkissjúkrahúsið. Og vit skuldu nokk vænta at vera í Keypmannahavn í trý ár. Tað var eitt øgiligt sjokk, sigur Jákup á Borg.

- Tað var forferdiligt. Simpilthen forferdiligt, sigur Susi á Borg.

Dagin eftir fara tey bæði við soninum til Danmarkar, og fleiri royndir verða gjørdar. Mergroyndin var tann altavgerandi royndin, tí hon kundi endaliga staðfesta, um talan var um krabbamein ella ikki. 

Eftir at hava bíðað í nakrar dagar eftir svari, fáa tey endiliga boð frá læknunum. Drongurin hevur ikki blóðkrabba. Hann hevur als einki slag av krabbameini. 

- Tað var fantastiskt, men eg var framvegis í sjokki. Tað var ein lætti, men allíkavæl ikki, tí har var okkurt galið, sigur Susi á Borg.

Stutt eftir bleiv staðfest, at sonurin hevur tarmsjúkuna cøliaki. Ein kronisk sjúka, sum ger, at tú als ikki kanst eta gluten. Nakað, sum er í rættiliga nógvum mati. Harafturat hevur sonurin etingarólag. Ivaleyst tí hann altíð hevur fingið pínu, tá hann hevur etið, halda foreldrini.

Ógvusliga upplivingin fyri skjótt tveimum árum síðani hevur sett síni spor.

Tey eru blivin meira religiøs.

- Vit bóðu øgiliga nógv hasa tíðina, og tað gera vit vanliga ikki. Vit hava altíð biðið Faðir vár við børnunum, men onkursvegna leggur mann størri dent á orðini nú. Hetta hevur av álvara settt síni spor, og vit gloyma tað ongantíð. Kanska er mann blivin eitt vet meira religiøsur, sigur Jákup á Borg.