Einki til hindurs fyri, at Eysturkommuna skipar egna framhaldsdeild

Tekniskt er einki til hindurs fyri, at Eysturkommuna skipar egna framhaldsdeild.

Tað metir arbeiðsbólkurin, sum hevur greinað skipan av egnari framhaldsdeild í Eysturkommunu. 

Í september 2023 samtykti býráðið í Eysturkommunu at seta ein bólk at kanna møguleikan fyri at skipa framhaldsdeild. Hetta arbeiðið er nú liðugt, og bólkurin er ikki komin fram til nakra grundgeving, fyri at hetta ikki ber til.

Hóast Per Martin Gregersen, borgarstjóri í Eysturkommunu, ikki væntar at Fuglafjarðar kommuna fer at taka undir við hesum, ætlar hann nú at arbeiða víðari við at fáa eina framhaldsdeild í kommununi til veruleika.

-  Tað er øgiliga nógv í kanningini, sum talar fyri, at Eysturkommunu kann skipa egnu framhaldsdeild, sigur Per Martin Gregersen, borgarstjóri.