Í kvøld verða gøtuljósini sløkt

Við at sløkkja ljósið í ein tíma er endamálið hjá Earth Hour, ella Jarðartímanum, sum tað eitur á føroyskum, at varpa ljós á veðurlagsbroytingar og umhvørvisvernd sum heild.

Tiltakið varð hildið fyrstu ferð í Avstralia í 2007, tá meir enn 2,2 milliónir fólk sløktu ljósið í ein tíma.

Síðani hevur jarðartímarørslan breitt seg um allan heimin, og í Føroyum var Tórshavnar kommuna í 2009 tann fyrsta at sløkkja ljósið.

Síðani eru fleiri aðrar føroyskar kommunur komnar við, og víða hvar um landið verður ljósið sløkt henda eina tíman í kvøld.

Kring heimin verður jarðartímin nú hildin í yvir 190 londum.