Váðaráðið: Eingin vandi á ferð

Váðaráðið metir framvegis, at tað ikki eru tekin um, at systemiskir váðar eru í umbúna í føroyska bankageiranum, men ráðið varnast, at útlánsvøksturin til kommunurnar er høgur, og at innlánsyvirskotið er minkandi.

At ein váði er systemiskur merkir, at váðin ikki bara er galdandi fyri ein einstakan peningastovn, men allar peningastovnarnar og harvið alt fíggjarkervið.

Útlánsvøksturin í føroysku bankunum var 9,5% í januar í ár og stavar serliga av øktum útlánum til kommunur og almenn feløg. Útlán til tað almenna eru tó ikki heft við sama váða sum útlán til privata geiran, vísir Váðaráðið á. 

Ráðið varnast tó, at spjaðingin av váða er lítil, eftirsum kommunurnar einans læna í Føroyum og mest sum einans frá føroyskum bankum.

Allir teir føroysku bankarnir hava eitt gott gjaldføri. Sambært Fíggjareftirlitinum eigur gjaldførið at vera omanfyri 100%, og sambært roknskapunum hjá bankunum var gjaldførið hjá øllum føroysku bankunum omanfyri 200% við ársenda 2023.