Finska løgreglan: Eitt rátt og tilætlað brotsverk

Vápnið, sum gerningsmaðurin nýtti, tá ið hann skeyt og drap ein næming í sætta flokki og særdi tveir álvarsliga í einum fólkaskúla í Vantaa, átti ein í familjuni. Vápnið var lógligt, skrivar finska kringvarpið. 

Leif Malmberg, kriminalkommisserur í finsku løgregluni, greiddi soleiðis frá skottilburðinum. 

"Tá ið vit komu á staðið kundu vit staðfesta, at trý vóru álvarsliga skadd. Seinni kundu vit staðfesta, at ein helst er deyður á skotstaðnum. Gerningsmaðurin var rýmdur av staðnum, men 50 minuttir seinni var hann handtikin. Ein í familjuni hjá honum eigur vápnið, men vit vita ikki enn, hvussu 12 ára gamli drongurin hevur fingið hendur á vápninum."

Skottilburður, Finnland, skúlaskjóting

Dráp og drápsroynd

Brotsverkið verður flokkað sum dráp og drápsroynd, men eingin ákæra verður reist, tí gerningsmaðurin er yngri enn 15 ár, - hann gekk í sætta flokki.

Løgreglan sigur, at talan er um eitt rátt og tilætlað brotsverk.

"Um tú tekur vápn við tær í skúlan, kunnu vit staðfesta, at ávís fyrireiking hevur verið," sigur Kimmo Hyvärinen, leiðandi kriminalkommisserur hjá løgregluni í Östra Nyland í Suður-Finnlandi.

Drongurin verður avhoyrdur og síðani taka sosialir myndugleikar sær av honum.