200 neyðhjálparfólk dripin, síðani kríggið byrjaði í Gasageiranum í oktober

Fleiri enn 200 neyðhjálparfólk eru dripin í krígnum í Gasa. 

Gasa er tí vorðið vandamiklasta staðið í heiminum hjá neyðhjálparfólki. Nú gevast nøkur teirra í arbeiðnum, og tað kann fáa avleiðingar, skrivar danska kringvarpið. 

Tað var mánadagin, at sjey neyðhjálparfólk frá felagsskapinum World Central Kitchen vórðu dripin, beint eftir at tey høvdu latið mat til Gasa. 

Við hesum álopinum, er talið á neyðhjálparfólkum farið upp um tey 200. Og hetta er álvarsamt, sigur Reyði Krossur, sum hevur mist fleiri fólk í Gasa. 

Marknalið verða latin upp

Ísrael fer fyribils at lata upp fleiri marknalið í Gasa, so sivilfólk fáa neyðhjálp.

Hesum boðaði ísraelski forsætisráðharrin frá fríggjanáttina, skriva fleiri ísraelskir miðlar.

M.a. verður marknaliðið við Erez, har norðuri í Gasa, latið upp fyribils. Tað hevur annars verið stongt síðani 7.oktober.