Prísvøksturin er 2,6 prosent

Prísvøksturin heldur fram, men nú hækka prísirnir við minni ferð, enn teir hava gjørt seinastu trý árini, veit Hagstovan at siga. 

Árligi vøksturin í brúkaraprístalinum var 2,6 prosent í februar í 2024 samanborið við februar í fjør.

Størsti prísvøksturin er í bólkinum, sum eitur býli.

Hann kemst av rentuhækkingum.

Húsarhaldsvørur bíligari

Men prísurin á ymsum húsarhaldsvørum og búnýti er lækkaður.

Og klæði og bilar eru eitt vet bíligari nú enn fyri einum ári síðani, skrivar Hagstovan. 

Matvørur kostaðu fýra prosent meira í februar í ár enn í februar í fjør.

Serliga fiskur, kjøt og grønmeti eru dýrari nú.