Vinnuhúsið fegnast um breiða politiska semju um tøkugjøld

Vinnuhúsið fegnast um, at politiska skipanin er farin undir at gera breiðar semjur, nú samgongan og Sambandsflokkurin hava gjørt avtalu um nýggja skipan fyri tøkugjøld fyri alivinnuna.

Breiðar politiskar semjur er vegurin fram, sigur Vinnuhúsið, og tørvur er á fleiri breiðum semjum. 

Millum annað á útbúgvingarøkinum, skatta- og avgjaldsøkinum, arbeiðsmarknaðarøkinum, útlendigaøkinum og bústaðarøkinum.

Minka um politisku óvissuna

Breiðar semjur minka um politisku óvissuna hjá vinnufyritøkum, sum skulu gera langtíðar íløgur. Fortreytin er sjálvsagt, at politisku flokkarnir kenna seg bundar av semjuni, sigur Vinnuhúsið.

Tað hevði verið ein fyrimunur um fleiri flokkar vóru við í hesi langtíðarsemjuni, heldur Vinnuhúsið. Tað hevði havt við sær, at flokkarnir vandu seg við arbeiðslagið, og samstundis var størri vissa fyri, at langtíðarsemjan varir fleiri samgonguskeið.

Uppskotið um tøkugjald er sent til hoyringar. Hoyringarfreistin er til 21.apríl.

Samgongan og Sambandsflokkurin hava gjørt uppskotið. Talan er um eina tvíliðaða skipan.

Vinnuhúsið

Tøkugjald og serskatttur

Annar parturin er ein nýggj tøkugjaldsskipan. Hin parturin er ein nýggjur serskattur, sum er átta prosent. 

Nýggja skipanin skal koma í gildi 1. januar 2025. 

Uppskotið um serskattin kemur í heyst.