Hugin buldraði seg til sigurs

Hugin Samuelsen vann fyrstu FM-kappingina í klintring í Føroyum. 

Kappast var í 'buldring', sum er klintring á veggi innandura, og Hugin Samuelsen vann í dysti við seks aðrar klintrarar. 

 - Eg helt, at eg hevði ein góðan kjans at enda í topp-trý, men eg visti ikki, um eg fór at vinna, segði Hugin Samuelsen, sum býr og venur í Danmark.

Fyrrverandi fótbóltsspælarin hevur kastað seg yvir klintringina, og hann fullførdi tríggjar av teimum fýra leiðunum, sum vóru á skránni til FM í Bacalao leygardagin, og vann frammanfyri Øssur D. Eiriksfoss og Markus Køtlum.

Væl nøgdur við fyrstu FM-kappingina

Fyri kortum var Klintrisamband Føroya skipað sum menningarsamband undir ÍSF, og formaðurin, Absalon Eysturoy, sum eisini rakk finaluni, var væl nøgdur við kappingina.

 - Tað hevur gingið regluliga fram, og spenningurin hevur verið í hásæti. Einki bleiv avgjørt fyrrenn tann seinasti luttakarin var uppi á tí seinastu leiðini, so tað var nógvur spenningur fyri bæði luttakarar og tey, sum hugt at og verið við, segði hann.

Innleiðandi umførini vóru fríggjadagin, tá 27 klintrarar royndu seg.