Hav Atlantic og Hav Nes hava lagt sandin upp á Sundi

Tey bæði farmaskipini hjá Navigare, Hav Atlantic og Hav Nes, eru nú leys aftur. Hav Atlantic er á veg til Noregs, og Hav Nes hevur sett kós móti Íslandi. 

Týskvøldið vóru skipini, fullfermd við sandi, á veg á Sund, men skipini sluppu ikki at bryggju tí verkfall er.

Tey fóru síðani á Runavík, har tey vóru løgd.

Hav Atlantic

Hav Atlantic er á veg til Noregs. (Savnsmynd: Navigare. fo)

Semja við arbeiðarafeløgini

Arbeiðarafeløgini hava gjørt semju við reiðaríið Navigare, soleiðis at skipini fingu tømt lastirnar á Sundi. Tey eru nú farin í vinnu aftur.

Álvur Højgaard, stjóri í Navigare, segði við Kringvarpið í gjár, at fingu skipini loyvi at lossa sandin úr lastunum, so fóru tey av landinum aftur. Og tey koma ikki aftur til Føroya, so leingi verkfall er.

Arbeiðarafeløgini hava gingið áheitanini á møti, og bæði skipini eru nú farin avstað.