Fakfelagsleiðarar: Vit fóru ikki frá samráðingarborðinum

"Tað vóru ikki fakfeløgini, sum reistust frá borðinum og endaðu samráðingarnar 3. mei. Okkara vilji til samráðing hevur alla tíðina verið til staðar, og er tað enn."

Tað skriva forfólk í fýra arbeiðarafeløgum í yvirlýsing, sum er send miðlunum fyri løtu síðani.

Okkara fremsta uppgáva sum fakfelag er at skapa livilig kor fyri verkafólk, og tað stríðast vit av øllum alvi fyri í hesum døgum, og okkara krøv eru púra greið. 

Tað merkir tó ikki, at vit ikki vilja vísa góðan vilja til at finna eina semju við samráðingarborðið, stendur í yvirlýsingini, sum Georg F. Hansen, Heri Reynheim, Jastrid W. Niclasen og Absalon Hansen hava skrivað undir.