Silvurligan: Taptu fyri finalistunum

Føroysku flogbóltskvinnurnar settu punktum fyri ársins Silvurligu á heimavølli ímóti Finnlandi.

Finsku favorittarnir vunnu dystin við trimum settum móti ongum, men føroysku spælararnir vóru væl nøgdir við avrikið í 2. og 3. setti.

 - Vit spældu væl. Finnland er eitt lið, sum liggur ovarliga í bólkinum og helst fer at vinna, so vit eru nøgdar við avrikið hjá okkum í dag, segði Hanna Andreasardóttir Olsen.

 - Vit kempa ordiliga væl í verjuna, vit hava góðar servur, men vit stríðast eitt sindur í álopsspælinum, tí tær hava ein øgiliga høgan blokk.

Nøgd við landsliðssummarið

Landsliðið byrjaði við venjingum fyrst í mai, tá heimligu kappingarnar endaðu, og Hanna Andreasardóttir Olsen heldur, at tær hava tikið seg nógv fram, síðan venjingarnar byrjaðu, og venjarin, Cristian Imhoff, er samdur.

 - Vit taptu gamaní 3-0 í dag, men vit taka okkum fram dyst fyri dyst, og kvinnurnar stríðast fyri sakini. Tað sást eisini í dystinum í dag, segði venjarin.

Hvat kunnu tit taka við tykkum frá hesi kappingini?

 - Vit hava fingið nógv harðari mótstøðu í hesum dystunum, enn vit eru vanar við her heima, segði Hanna Andreasardóttir Olsen.

 - Tað læra vit nógv av og kunnu brúka tað til at betra okkum heima í feløgunum til næsta ár.