Nýggja plátan hjá Eivør verður frumspæld í Leitisstein í kvøld

Fríggjadagin 14. juni útgevur Eivør Pálsdóttir sína 10. soloplátu, "Enn".

Hetta er fyrsta plátan hjá Eivør undir nýggja plátufelagnum Season Of Mist. 

Season Of Mist er í roynd og veru eitt tungmálmsplátufelag, og millum kendastu nøvnini, ið hava sáttmála við Season Of Mist, eru bólkar sum Heilung og Mayhem. 

Eivør Pálsdóttir, Enn

Mynd: Sigga Ella

Nýggja plátufelagið er eisini beinleiðis orsøk til, at Eivør í summar kann upplivast á tungmálmsfestivalum sum Copenhell og Hellfest.

Beinleiðis í Leitisstein 

Í kvøld klokkan 21 er Eivør Pálsdóttir gestur í Leitisstein Live, har hon fer at frumspæla nýggju plátuna hjá sær, ið hevur fingið heitið “Enn”. 

“Enn”, ið kemur út fríggjadagin 14. juni, er 10. soloplátan hjá Eivør.

Á plátuni eru átta sangir, ið Eivør hevur skrivað í samstarvi við Trónd Bogason, tónasmið, ið eisini er maður hennara, og Marjuna Syderbø Kjelnæs, rithøvund.

Eivør Pálsdóttir, Enn

Mynd: Sigga Ella

Saman við manninum, Tróndi Bogasyni, flutti Eivør til Tjørnuvíkar í eina tíð fyri at skriva tónleik. Ætlanin var at skapa eitt lítið síðuprosjekt. 

"Tað gjørdist mær tó skjótt greitt, at eg skuldi ikki hugsa um tónleikin, ið vit skapaðu sum eitt síðuprosjekt," sigur Eivør. "Tónleikurin var umboðandi fyri, hvar eg var listarliga." 

Fyrsti sangurin, ið bleiv skrivaður liðugur fyri "Enn", var sangurin "Gaia", sum Eivør lýsir sum ein kærleikssálmur til jørðina, sum minti hana um renesansutónleikin, ið henni dámdi so væl sum barn. 

Meira um "Enn" í Leitisstein í kvøld. 

Eivør Pálsdóttir, Enn

Mynd: Sigga Ella

Hvat: Leitisstein Live
Hvør: Eivør Pálsdóttir
Hvar: í útvarpinum og á KVF Ljóð
Nær: í kvøld, týskvøldið, kl. 21
*Lurtararnir kunnu eisini geva sítt íkast til sendingina við at senda smsboð á 224000.