Fiskavirkisskipan kostar nú meira enn vanligt arbeiðsloysi

Fyri fyrstu ferð hevur ALS goldið meira til fiskavirkisskipanina enn í vanligum arbeiðsloysisstuðli. 

28,3 milliónir krónur fóru til fiskavirkisskipanina í fjør.

Vanligur arbeiðsloysisstuðul var 26,9 mió. kr.

ALS kom í 1992. 

Hesi 31 árini, fiskavirkisskipanin hevur virkað, eru goldnar slakar 653 mió. kr. til starvsfólk á fiskavirkjum.

Við ársbyrjan í fjør vóru 1.230 fólk í fiskavirkisskipanini.

Tey vóru 1.000 við árslok.

Í dag eru 926 fólk í skipanini.

Í ársfrágreiðingini hjá ALS fyri 2023 sæst, hvørji virki brúktu fiskavirkisskipanina í fjør.

Tey eru 26.

Stýrið í ALS hevur biðið Umhvørvismálaráðið broyta fiskavirkiskunngerðina, so kravið um at vera tøk ella tøkur á arbeiðsmarknaðinum verður strikað.

Tað kravið kom annars í september í fjør. 

Leiðslan hjá ALS heldur, at útlendingar, sum hava staðbundið arbeiðsloyvi, ikki kunnu lúku krøvini um at vera tøkir.

Tí hava teir, sambært kunngerðini, ikki rætt til pengar úr fiskavirkisskipanini. 

Tað er eisini ivasamt, um føroyingar og onnur lúka krøvini um at vera tøk ella tøkir, tá tey hava setanarligt tilknýti til ávísan arbeiðsgevara. 

Bara ein broyting

Eingin onnur broyting, sum ALS-stýrið mælti landsstýriskvinnuni til at gera, eru gjørdar.

Men tekin eru um, at ætlanin er at gera tær í næstu tingsetu, sigur ALS-stýrið.

Uppskot um broytingarnar eru at stytta tíðina, sum fólk kunnu vera í fiskavirkisskipanini uttan at arbeiða, úr átta vikum niður í fýra.

Eitt annað uppskot er at seta í skipanina virkniskrav, 16 tímar, seinastu fýra vikurnar.

Og uppskot er um bíðitíð í fýra vikur fyri at koma aftur í fiskavirkisskipanina, um fólk vóru fallin fyri virkniskravinum.