Sól til 140 húsarhald

Hiddenfjord hevur lagt 828 sólfatur, ella sólpanel, á tekjurnar á tveimum bygningum á smoltstøðini á Fútakletti. 

Tey kunnu gera streym, sum svarar til streymnýtsluna hjá 40 húsarhaldum um árið, sigur Hiddenfjord.

Fyri tveimum árum kom eitt sólorkuverk á landstøðini hjá Hiddenfjord á havnarlagnum í Miðvági. 

Tað verkið ger streym, sum svarar til árligu nýtsluna hjá 25 húsarhaldum.

Í allar ættir

Eftir summarfrítíðina verður farið undir at seta upp enn eitt sólorkuverk á smoltstøðini á Fútakletti.

Tað fer at gera streym, sum svarar til nýtsluna hjá 75 húsarhaldum.

Elveitingarlógin var broytt í mai í ár. 

Nú ber til at útvega sólorku til egna nýtslu, og verður orkan frá hesum verkinum brúkt beinleiðis á smoltstøðini, sigur 
Hiddenfjord.

Sjúrður Ferjá, orkumennari hjá Hiddenfjord, sigur, at sólpanel á tekjum, sum venda suðureftir, gera mesta orkuna.

Men Hiddenfjord vil vera við til at útvega hagtøl og vitan um sólorku í Føroyum, so sólpanel eru løgd á allar síður, eisini norðursíðuna, sigur Sjúrður Ferjá.