Friðingarnevnd tekur avgerð nú í august

Náttúrufriðingarnevndin í Sandoyar sýslu fer seinni í august at gera niðurstøðu um vindmyllurnar í Klivaløkshaga.

Tað sigur Kristjan Martin Joensen, sýslumaður, sum er formaður í nevndini.

Nevndin hevur fingið umsókn frá Elveitingareftirlitinum í Umhvørvisstovuni um prinsipielt loyvi at seta upp sjey vindmyllur vestan fyri Sands bygd, i einum ella fleiri hagapørtum í Klivaløkshaga.

Søkt er eisini um at sleppa at gera veg til myllurnar gjøgnum hagapartar í Fjallshaga.

Ástaðarfundur var 26. juni.

Sama um nakar kærir avgerðina hjá friðingarnevndini, skal málið eisini viðgerast í Yvirfriðingarnevndini.