TAKS: Útlendskir ferðaleiðarar kunnu virka í Føroyum uttan at gjalda skatt

Tá útlendsk ferðafólk lenda í Vágum, er tað vorðið heilt vanligt, at útlendskir ferðaleiðarar frá ferðaskrivstovuni, haðani tey keyptu ferðaseðilin, standa og taka ímóti.

Harvið hava føroysku ferðaleiðararnir fingið kapping, og tað argar, sum Hilda Thomsen, forkvinna í Føroya Ferðaleiðarafelag, eisini hevur verið frammi í fjølmiðlunum um síðstu dagarnar. 

Men sambært skattalógini er ongin trupulleiki í hesum, at útlendskir ferðaleiðarar virka í Føroyum - eisini sjálvt um útlendsku ferðaleiðararnir ikki gjalda skatt í Føroyum.

Tað sigur Poula á Líðarenda, deildarleiðari hjá TAKS.

ferðafólk, ferðavinna

Tilvildarlig mynd av ferðafólkum (Mynd: Bjarni Árting Rubeksen)

Altso, so kann ein italsk ferðaskrivstova saktans senda sín egna ferðaleiðara til Føroya at arbeiða, uttan at gera seg inn á skattalógina, og uttan at viðkomandi skal rinda skatt í Føroyum.

Tað sama hevði verið galdandi, um føroyingar sendu egnar ferðaleiðarar í onnur lond.

Skulu hava eitt arbeiðsloyvi

Nú koma vit kortini til eitt men.

Meðan føroyingar frá degi til dags kunnu fara til eitthvørt ES-land at arbeiða, tí vit eru danskir ríkisborgarar, so er ikki tað sama galdandi fyri ES-borgarar, sum koma her - heldur ikki ferðaleiðarar.

Her krevur okkara útlendingalóggáva, at tú skalt hava arbeiðsloyvi, staðfestir Kristina Ellendersen, løgfrøðingur á útlendingastovuni.

Fáa ferðaleiðararnir slíkt uppihaldsloyvi, so kunnu teir í veruleikanum kappast við føroyingarnar í 180 dagar, áðrenn teir skulu gjalda skatt til føroyska samfelagið.