Skúlastjórin í Sankta Frans: "Umstøðurnar eru virkuliga góðar"

88 næmingar byrjaðu í dag í nýggju framhaldsdeildini í Sankta Frans skúla í Havn. Hetta er fyrsta árið, at Sankta Frans skúli hevur framhaldsdeild. 

"Vit hava virkuliga góðar umstøður. Tað er væl frágingið, og vit hava ljós og góð hølir,"  sigur Aslaug Olsen, skúlastjóri. 

Aslaug Olsen fegnast eisini um, at Sankta Frans skúli í Havn nú kann bjóða eitt fullfíggjað skúlatilboð úr 1. í 9. flokk. Øll árini hava næmingarnir verið noyddir at leita sær aðrar leiðir, tá teir eru lidnir við 7. flokk. Men við nýggju framhaldsdeildini er hetta ikki neyðugt longur.

Skúlastjórin væntar, at hendan sannroynd fer at hækka støðið á skúlanum.

"Bæði tí vit hava fingið fleiri lærarar, so okkara professjonella rúm er blivið størri, men eisini tí, at vit nú skulu skipa fyri fráfaringarroyndum fyri 9. flokk, og hetta hava vit ikki roynt áður í Sankta Frans skúla."

Sankta Frans skúli, Framhaldsdeild