Taraskógir vaksa við veðurlagsbroytingum

So hvørt, sum hitin í havinum veksur vegna veðurlagsbroytingar, og nýggj havøki og firðir gerast ísfrí, eru ábendingar um, at tari fer at breiða seg í økjum nærri pólunum.

Júst hetta, at tarin fær betri pláss, er eitt lítið ljóspunkt, tí tarin upptekur nevniliga koltvíilt, sum aftan á nøkur ár verður langtíðarvarðveitt á botninum á djúpum havi. 

Granskingarverkætlanin, BlueCea, hevur kannað tarastandin á føroysku- og grønlendsku firðunum seinasta 1 1/2 árið. Narissa Bax, granskari á grønlendsku umhvørvisstovuni, samskipar verkætlanina.

Tá sjógvur upptekur og varðveitir koltvíilt á havbotninum, nevnist hetta blátt kolevni.

Sjógvurin her norðuri á klótuni er serliga áhugaverdur at kanna í samband við bláa kolevnið, tí tað verður mett, at sjógvarnir her um leiðir fara at standa seg frægast í veðurlagsbroytingunum.

Narissa Bax sigur í samband við verkætlanina at fyri framhaldandi at fáa gagn av kolevnissvølgum við pólarnar og fyri at keypa okkum tíð ímóti veðurlagsbroytingum, mugu vit tryggja, at vistskipanir í djúphavum og leiðir, sum tann frá makroalgu til botnseting á djúphavi, eru væl vardar ímóti neiligari menniskjaligari ávirkan.