Tríggir býráðslimir hjá Tjóðveldi stilla ikki upp aftur

Tríggir býráðslimir hjá Tjóðveldi í Tórshavnar býráð stilla ikki upp aftur til kommunuvalið í november. 

Seinastu dagarnar hava Jákup Dam og Annika Olsen sagt við in.fo, at tey ikki stilla upp aftur, og í dag váttar Gunvør Balle fyri Kringvarpinum, at heldur ikki hon bjóðar seg fram aftur. 

- Síðsta val tók eg avgerð um, at hetta var seinasta setan, sigur Gunvør Balle.

Raðfestir borgarliga starvið

Hon vísir á, at hon hevur verið í politikki í 13 ár, men at tíðin nú er komin at raðfesta borgarliga starvið fram um politikkin. 

- Tað er torført at samantvinna býráðspolitikk við eitt vanligt starv. Nú er tíðin komin at raðfesta tað borgarliga starvið framum. Men eg havi verið glað fyri tíðina í politikki, sigur Gunvør Balle. 

Annika Olsen, mynd Bjarni

Annika Olsen á vali. Hon gevst nú í býráðspolitikki. (Mynd: Bjarni Árting Rubeksen)

Fyrr í dag segði Annika Olsen, sum var vald í býráðið fyri Fólkaflokkin, men seinni skifti til Tjóðveldi, at eisini hon fer at raðfesta øðrvísi. 

- Fyribils vil eg at brúka alla mína orku til løgtingsarbeiðið, og eg føli eisini, at hetta er skyldan mótvegis mínum veljarum, sum vístu mær stuðul á løgtingsvalinum, sigur Annika Olsen við in.fo.

Jákup Dam, kommunuval 2020, uppteljing

Jákup Dam hevur verið býráðslimur trý valskeið. (Mynd: Bjarni Árting Rubeksen)

Jákup gevst eisini

Og fyrr í vikuni segði Jákup Dam, at hann gevst eisini, eftir hava sitið trý valskeið í býráðnum.

- Hetta hevur verið ein spennandi tíð, og mær hevur dámt býráðsarbeiðið væl. Eg eri lærari í Kollafirði, og eg má ásanna, at býráðsarbeiðið er ein stór ábyrgd, sum eisini krevur nógva tíð. Tað eru fáir dagar, har ikki onkrar uppgávur eru. 

Elsa Berg

Elsa Berg var toppskorari hjá Tjóðveldi á seinasta býráðsvali í Havn.

Elsa stillar upp aftur

Fjórða umboðið hjá Tjóðveldi í høvuðsstaðarkommununi er Elsa Berg. Hon gjørdist toppskorari hjá flokkinum til síðsta val við 520 persónligum atkvøðum.

Og hon bjóðar seg fram aftur á valinum í november. 

- Eg gleði meg til valið. Tørvur er á at seta fokus á borgarar, kjarnuvælferð, nátturu og umhvørvi, sigur hon í stuttari viðmerking.