- Tíðindi, mentan og ítróttur
Noyðast at venja seg við at hava ísbjarnir í túninum
![](https://kvf.fo/sites/default/files/styles/grein-ovasta-mynd/public/fernando_ugarte.jpg?itok=HNflUe8c)
At ísbjarnir nærkast húsum og kunnu vera í túninum hjá fólki í Grønlandi, er ikki so sjáldsamt, sum tað hevur verið.
- Hetta er ein veruleiki, vit mugu venja okkum við, og tað krevur av okkum, at vit broyta vanar, sigur lívfrøðingurin, Fernando Ugarte, við grønlendska útvarpið, KNR.
Í Eysturgrønlandi hava síðsta mánaðin verið fleiri tilburðir við bjarnum, ið eru komnar ov nær fólki, og síðst í juli var ein týskur granskari álopin av eini ísbjørn á Traill-oynni.
Hetta hevur fingið bæði borgarstjóran í Suðurgrønlandi og felagið hjá seyðahaldarum at mæla til, at kvotan á ísbjarnum, ið kunnu skjótast, verður hækkað.
Samlaða ísbjarnakvotan í Grønlandi er 156 ísbjarnir, og ísbjørnin verður har ikki roknað sum eitt hótt djóraslag.