Kunnu nú søkja um undangóðkenning at byggja røktarheim í Hoyvík

Nú er klárt hjá arbeiðstakarum at søkja um undangóðkenning at byggja Røktarheimið á Stórubrekku í Hoyvík.

Tað skrivar heimasíðan hjá Tórshavnar kommunu.

Sáttmáli varð í oktober í fjør gjørdur millum EYA og Tórshavnar kommunu, um at projektera nýggja røktarheimið. 

Í røktarheiminum verða 64 búpláss til eldri, 16 røktaríbúðir og dagtilboð til 50 eldri, heimabúgvandi borgarar.

Røktarheimið verður bygt oman fyri bygningin hjá Føroya Tele á einum øki, ið er 50.000 fermetrar til víddar. Bygningurin verður umleið 6.700 fermetrar.

Umframt tilboðini til eldru borgararnar, verða stórkøkur, vaskarí, høli til fysioterapi og ergoterapi o.a. í bygninginum.

Freistin at søkja um undangóðkenning er 13. september, skrivar kommunan.