Álopið við Sandá: Fýra vikur aftrat í varðhaldinum

Maðurin, sum er skuldsettur fyri at leypa á eina kvinnu við Sandá 28. apríl, skal sita fýra vikur aftrat í varðhaldi. Tað hevur rætturin avgjørt í dag.

Ákæruvaldið grundgav fyri at leingja varðhaldsfongslinum, at vandi var fyri, at maðurin fór av landinum.

Maðurin vildi ikki sjálvboðin vera í varðhaldi longur, og tí var rættarfundur.

Maðurin hevur verið í varðhaldi síðani 28. apríl.

Longt fleiri ferðir

Varðhaldið er tí longt nakrar ferðir. 

Viðhvørt vil maðurin sjálvboðin leingja varðhaldið. Men viðhvørt vil hann lata rættin avgera tað.

Og tá kærir hann úrskurðin til Eystara landsrætt, sum tó higartil hevur givið Føroya rætti viðhald.

Gekk eftir gøtuni við Sandá

Tað var 28, apríl, at ein ung kvinna varð álopin, meðan hon gekk túr eftir gøtuni ovarliga við Sandá í Havn.

Gerningsmaðurin leyp á kvinnuna aftanífrá og framdi ógvusligan harðskap móti henni. 

Umleið eitt korter eftir álopið handtók løgreglan ein mann í kirkjugarðinum við Velbastaðvegin.

Maðurin er í tríatiárunum og er útlendingur.