Fleiri ferðsluóhapp, tó uttan skaða

Á vegastrekkinum millum Áargeil og Gundadalsvegin í Havn endaði ein bilur í gjár í eini á eftir fyrst at hava koyrt ígjøgnum eina girðing. Eingin fólkaskaði var, men illgruni var um rúsdrekkakoyring, og blóðroynd var tikin av bilførarunum.

Í nátt var ferðsluóhapp við ljóskurvarnar í Bøkjarabrekku í Havn, har ein bilur koyrdi út fyri ein annan. 

Annar bilurin kundi ikki koyra víðari, og Sløkkiliðið mátti flyta hann burtur. Annar bilførarin verður helst ákærdur fyri ikki at hava hildið ferðslureglurnar.

Og í Skálafirði koyrdi ein bilur tíðliga í morgun inn í bilverjuna. Bilurin fekk stóran skaða, og pláturnar vórðu tiknar av honum. Heldur ikki í hesum førinum var fólkaskaði, sigur vaktleiðarin hjá løgregluni í morgun.