Vápn í túsundatali tikin á amerikanskum flogvøllum

Nærum 20 skotvápn um dagin verða tikin í trygdareftirlitinum á amerikanskum flogvøllum.

Tað vísir ein nýggj frágreiðing, sum flutningsstovnurin TSA hevur latið gera, sambært norska kringvarpinum NRK.

Tilsamans vórðu 5.028 skotvápn funnin í trygdareftirlitinum fyrstu níggju mánaðirnar í ár. Tað svarar til 18,3 vápn í miðal um dagin.

93 prosent av skotvápnunum eru lødd, tá tey verða funnin.

Um tú verður tikin við vápni í amerikanska trygdareftirlitinum, kanst tú verða handtikin ella fáa eina bót upp í 15.000 dollarar - tað er beint omanfyri 100.000 krónur. Lokala løgreglan verður eisini tilkallað at taka sær av vápninum.

Tað er ólógligt at hava vápn við í handviðføri í USA, men í mongum førum er loyvt at hava vápn í viðføri, sum er innskrivað.