Fleiri vikur til fleiri

Fólk, sum fáa fleirburðar, tvíburðar ella fleiri børn, eiga at fáa fleiri vikur í  barsilsfarloyvi at halda samstundis.

Tað er ein broytingin, sum er á veg í barsilslógini.

Umhvørvismálaráðið hevur sent til hoyringar uppskot um nakrar broytingar í barsilslógini.

Ein onnur broyting er, at foreldur, sum ættleiða, eiga at fáa fleiri vikur.

Eitt uppskot er at leingja barsilsfarloyvið, tá barnið er innlagt.

Fólk, sum hava fyribils staðsett barn, kunnu fáa barsilspengar.

Fyribils staðseting steðgar, tá Familjufyrisitingin gevur loyvi til ættleiðing, ella rætturin avger, at avgerðin hjá Familjufyrisitingini um ættleiðing verður sett úr gildi.

Hámarksgjaldið javnað

Og so er uppskot um at javna árliga hámarksgjaldið.

Javningarprosentið fyri hámarksgjaldið verður útroknað sum miðaltalið av prosentvísu broytingini í lønarkarminum og prosentvísu broytingini í brúkaraprístalinum. 

Umhvørvismálaráðið sigur, at ásetingar um fleksiblan barsil ikki eru við í hesum uppskotinum.

Men arbeiðið við teimum heldur fram. Uppskotið kemur helst eftir ársskiftið.

Umhvørvismálaráðið væntar ikki, at broytingarnar krevja, at inngjaldið til Barsilsskipanina hækkar.