Mvg-afturbering kann hava við sær, at prísurin at byggja hækkar

Meirilutin í fíggjarnevndini, allir flokkar uttan Fólkaflokkurin, tekur ikki undir við uppskoti Fólkafloksins um mvg-afturbering fyri bústaðabygging.

Meirilutin heldur, at eitt slíkt uppskot kann ikki standa einsamalt.

Sambært uppskotinum skulu tey, sum byggja, sleppa undan meirvirðisgjaldi í staðin fyri at fáa rentustuðul.

Meirilutin sigur, at fíggjarnevndin fekk at vita, tá hon viðgjørdi málið, at uppskotið kann gera, at stóra trotið á býlum og handverkarum kann føra við sær, at prísurin at byggja hækkar. 

Vansin er, at dýrari tilfar og arbeiðsløn kann úthola mvg-afturberingina, sigur meirilutin. 

Abjóðingin meira samansett

Samanumtikið heldur meirilutin, at avbjóðingin á bústaðamarknaðinum er nógv meiri samansett.

Tí verður neyðugt at koma við einum bústaðarpakka við nøkrum lógaruppskotum.

Einstøk uppskot loysa ikki avbjóðingarnar og kunnu tí ikki standa einsamøll, sigur meirilutin í fíggjarnevndini.

Fólkaflokkurin sigur, at afturberingin verður goldin alt fyri eitt.

Rentustuðulin verður goldin yvir 30 ár.