Kæra ES til WTO

Á Løgmansskrivstovuni fara tey fyrsta dagin at gera av, nær rætta løtan er at kæra handilsstongsulin hjá ES til WTO, heimshandilsfelagsskapin.

Landsstýrið fær fulltrú frá danska Uttanríkisráðnum til at kæra, tí Føroyar eru ikki sjálvstøðugur limur í WTO.

Kaj Leo Holm Johannesen, løgmaður, hevur ráðført seg við Uttanlandsnevndina og Fíggjarnevndina hjá løgtinginum um ætlanina hjá landsstýrinum at kæra ES til WTO.

Gunnar Holm Jacobsen, deildarstjóri í Uttanríkistænastuni á Løgmansskrivstovuni, sigur, at í hesari vikuni verður avgjørt, nær rætta løtan er at senda kæruna.

Ein gerðarrættur skal eisini viðgera ES-boykottið móti Føroyum, sum nú hevur vart í tveir mánaðir.

Har hava Føroyar og ES tilnevnt hvør sín dómara. Nú skulu tveir dómarar afturat finnast til gerðarrættin.

Tá fýra dómarar eru í gerðarrættinum, skulu teir velja fimta dómaran.

ES hevur tilnevnt eysturríkaran Gerhard Hafner, professara í altjóða rætti, og Føroyar hava fingið kilska professaran, Francisco Orrego Vicuna, sum gerðarrættardómara.