Skulu gera greitt, at vit eru partur av vesturheiminum

Føroyar hava stóran geopolitiskan leiklut, og vit skulu melda greitt út, at vit eru partur av vesturheiminum.

Tað sigur Anna Falkenberg, fólkatingslimur fyri Sambandsflokkin, sum heldur, at saman við Danmark og Grønlandi standa vit sterkari mótvegis umheiminum.

Hon fer á fund við stjórnina í kvøld um støðuna millum USA og Danmark eftir tað, sum nýggi amerikanski forsetin, Donald Trump, hevur sagt um Grønland og Danmark seinastu dagarnar:

Danska stjórnin hevur boðað øllum flokkum á fólkatingi til fundar í kvøld um støðuna eftir vitjanina hjá Donald Trump yngra í Grønlandi fyrr í vikuni og um tað, sum komandi amerikanski forsetin hevur sagt um Grønland og Danmark.

Lars Løkke Rasmussen, uttanríkisráðharri, sigur, at støðan er álvarslig, men hann heldur ikki, at talan er um eina kreppu í viðurskiftunum millum USA og Danmark.

- Hetta er ein avbjóðing í ríkisfelagsskapinum, og tað hevur týdning at kunna forfólkini í politisku flokkunum, sigur Lars Løkke Rasmussen.

Meiri verður at frætta í tíðindunum klokkan 18.