Norska gassframleiðslan setti met

Norra hevur ongantíð framleitt meira av gassi enn í fjør, tá kríggið í Ukraina hevði við sær, at einki gass longur fór ígjøgnum gassleiðingarnar úr Russlandi um Ukraina.

Tilsamans seldi Norra 124 milliardir standard-rúmmetrar av gassi, samanborið við 116,1 milliard standard-rúmmetrar árið fyri, skrivar norska NTB-tíðindastovan.

Gamla metið var frá 2022, tá ið norska gassframleiðslan var 122,8 milliardir standard-rúmmetrar.

Gassframleiðslan stendur fyri yvir helvtini av framleiðsluni á norska landgrunninum.

Meginparturin av oljuni og gassinum verður flutt í rørleiðlingum til ES-lond og Bretlands.

- Norski landgrunnurin fer at hava stóran týdning fyri orkutrygdina í Europa í mong ár, metir norska oljustýrið.