Trot á umlætting

Tað gongur ikki væl at bjóða fólki, sum eru yngri enn 67 ár og hava demens, umlætting.

Almannaverkið heldur tað vera skilagott at samstarva við kommunur um at keypa umlætting.

Tó er ymiskt, hvussu nógv umlættingarpláss kommunurnar hava.

Tað er eisini ymiskt, hvussu kommunurnar raðfesta samstarvið um tey yngru. 

Hetta ger, at atgongdin hjá yngri, sum hava demens, til umlættingarplássini ikki er eins um alt landið. 

Tað stendur í svari frá Sirið Stenberg, landsstýriskvinnu, til Bárð á Lakjuni, løgtingsmann.

Hon sigur eisini, at tað hevur eydnast væl at samskipa dagtilboð til yngri við demens. 

Sambært Heilsumálaráðnum eru 26 fólk undir 67 ár, sum hava fingið staðfest demens, og eru knýtt at Demensklinikkini á Landssjúkrahúsinum.

Almannaverkið hevur í síni skipan í løtuni 12 fólk, sum hava demens, og eru yngri enn 67. 

Fýra teirra búgva í røktarheimi ella ellisheimi.

Fimm koma í dagtilboði hjá Almannaverkinum og hava møguleika at fáa umlætting í tann mun, Almannaverkið kann keypa umlætting frá kommununum.