Torir ikki at gita, hvørja framtíð USA hevur í Nato

Norski fíggjarmálaráðharrin og fyrrverandi Nato-aðalskrivarin, Jens Stoltenberg, vil ikki gita um, hvørja framtíð USA hevur í Nato. 

Men hann er púra greiður í einum máli:

- Vit liva tíverri í eini tíð, sum vit onga vissu hava fyri nøkrum sum helst, .. satt at siga. Men tað, sum vit vita, er, at USA er sáttmálabundið við Nato. Vit vita eisini, at hóast nógvur gangur var seinast, Trump var forseti, so helt USA sínar Nato-skyldur, sigur Stoltenberg við norska TV2. 

Gera íløgur í verjuna

Hann staðfestir eisini, at í staðin fyri at hugsa um, hvat kann ganga galið, so mugu vit gera meira av tí, sum kann bøta um møguleikarnar fyri, at tað gongur væl.

- Tað er at gera fleiri íløgur í verjuna. Tað hevur dupultan fyrimun, sigur Stoltenberg.

Í løtuni er meira sannlíkt, at USA fer at skerja stuðulin til NATO, heldur fyrrverandi aðalskrivarin.

- Eg haldi, at tú mást síggja hetta í tveimum. At fara úr NATO, er ikki nakað, sum USA hevur tosað um. Men at USA kann minka talið av amerikonskum hermonnum í Evropa, er ein møguleiki, sum teir sjálvir hava lagt á borðið. So tað kunnu vit ikki útihýsa, sigur Stoltenberg við norska Tv2.