Haraldur kongur verður jarðaður í dag

Kongaligir gestir og ríkisleiðarar eru komnir til Noregs at vísa Haraldi kongi seinasta heiðurin, nú hann fer til gravar í dag.

Fleiri gistingarhús í miðbýnum í Oslo eru fullsett í sambandi við jarðarferðina, og onnur enn tey, ið skulu fylgja, sleppa ikki at gista. 

Fríðrikur kongur og Mary drotning umboða Danmark við jarðarferðina.

Tey búgva umborð á Dannebrog.

Haraldur kongur jarðarferð

Politiið væl mannað

Norska politiið er væl fyrireikað og væl mannað. Okkurt um 3.500 hermenn í norsku verjuni vera eisini á varðhaldi til jarðarferðina, og norðmenn fáa hjálp frá svenska og danska politinum.

Jarðarferðin hjá Haraldi kongi er bara fyri serliga innbodnum, og tað er norska uttanríkisráðið, ið hevur sent gestunum innbjóðing vegna kongshúsið.

Sambært norska miðlinum, Nettavisen, er gestalistin loyniligur. 

Norska fregnartænastan, PST, hevur fyrr sagt, at hon er fyrireikað til, at amerikanski forsetin, Donald Trump, kemur at fylgja.

Haraldur, kongur, doyði 28. august, 89 ára gamal.

Samsenda við NRK

Kringvarpið samsendir við NRK beinleiðis frá jarðarferðini, ið byrjar klokkan 11 føroyska tíð, tá høvuðsportrið á slottinum verður latið upp, og 21 kanónskot verða latin av á Akershus borgini.

Kistan við konginum verður síðani flutt frá slottinum til dómkirkjuna í Oslo.

Jarðarferðin í dómkirkjuni byrjar klokkan 12 við almennari hátíðarløtu og gudstænastu.