Fleiri fingu klipp í koyrikortið

Fleiri bilførarar hava hetta seinasta samdøgrið fingið klipp í koyrikortið fyri brot á ferðslulógina.

Tá politiið seinnapartin í gjár gjørdi ferðslukanningar í Klaksvík, fingu fimm bilførarar klipp fyri ov nógv ferð, umframt at ein fekk eitt eykaklipp, tí eitt barn í bilinum ikki sat íbundið.

Og í nýggja Hvannasundstunlinum fekk ein bilførari klipp í kortið, tí hann koyrdi 109 km/t.

Í gjárkvøldið blivu tveir bilar tiknir Millum Fjarða fyri at koyra ov skjótt – annar fekk klipp í kortið og hin treytaða frádøming.

Og ein bilførari, sum í gjárkvøldið gjørdi tvær yvirhálingar í Kaldbakstunlinum, fekk eitt klipp fyri hvørja.