Týskland og Frakland finnast at handtøku í Turkalandi

Týskland og Frakland fordøma hvassliga, at andstøðupolitikarin, Ekrem Imamoglu, er handtikin og situr í fongsli.

- Politisk kapping skal ikki fremjast gjøgnum dómstólar og fongsul, sigur talsfólk fyri týska uttanríkisráðið.

Imamoglu, sum var borgarstjóri í Istanbul, var í síðstu viku handtikin í sambandi við skuldsetingar um mutur og yvirgang.

Hann vísir øllum skuldsetingum aftur og heldur, at málið er politiskt.

- Vit vænta, at skuldsetingarnar verða kannaðar við størsta opinleika, og at tilgongdin er grundað á meginreglurnar í rættarsamfelagnum, stendur í týsku fráboðanini.

Álop á fólkaræðið

Eitt talsfólk fyri franska uttanríkisráðið kallar fongslingina av Imamoglu fyri eitt álop á fólkaræðið.

Talsfólkið ger eisini vart við, at Turkaland hevur sagt seg fara at verja rættindini hjá andstøðupolitikarum, og leggur aftrat, at virðing fyri hesum skyldum hevur stóran týdning í turkiskum viðurskiftum, eins og í sambandinum millum Turkaland og ES.

Í gjár var atkvøðugreiðsla í størsta andstøðuflokkinum í Turkaland, CPH, har valevni til forsetavalið í 2028 skuldi veljast. 

Turkaland, mótmæli í Turkalandi

Stórar mótmælisgongur hava verið í Turkalandi seinastu í dagarnar í sambandi við at borgarstjórin í Istanbul er handtikin. (Mynd: AFP/Ritzau Scanpix)

Fekk meira enn helvtina av atkvøðunum

Og Ekrem Imamoglu, borgarstjórin í Istanbul, fekk meira enn helvtina av atkvøðunum, skrivar AFP.

15 milliónir vóru á vali, sambært tølum frá ráðhúsinum í Istanbul, og 13.211.000 atkvøddu fyri Imamoglu.

Einki verður tó sagt, um Imamoglu alment er tilnevndur forsetavalevni hjá CPH.

Flokkurin skírir støðuna at vera eina kvettroynd at forða Imamoglu at bjóða sitandi forseta, Recep Tayyip Erdogan, av á næsta forsetavali.