Tollkríggið ávirkar føroyskar pensjónir

Pensjónirnar hjá føroyingum eru minni verdar í dag enn fyri fáum døgum síðani. Tað er ein beinleiðis avleiðing av nýggja tollinum, sum kom í gildi klokkan fimm í morgun. Arnfinnur Gudjónsson er íløguleiðari hjá Lív, sum umsitir ein stóran part av pensjónsuppsparingunum hjá Føroyingum. Seinastu dagarnar hevur hann fylgt sera væl við á partabrævamarknaðunum, har ótryggleiki valdar, orsakað av politikkinum hjá Donald Trump. Og í dag kann hann staðfesta, at pensjónsuppsparingarnar hjá føroyingum eru falnar í virði. Pensjónsfeløgini royna at fáa pensjónirnar hjá okkum at vaksa í virði við at seta tað, sum vit gjalda inn í ymisk partabrøv. Og tá órógv er á partabrævamarknaðinum, so lækkar virðið á pensjónunum hjá okkum.