H71-kvinnurnar í finaluna imóti Kyndli

Við sannførandi sigri á VÍF tryggjaðu kvinnurnar hjá H71 sær pláss í FM-finalunum, har Kyndil bíðar.

VÍF byrjaði betur, men heimaliðið fekk skjótt takið á dystinum, og slapp til hálvleiks við javnleiki. Eftir steðgin struku hoyvíkingar avstað beinanvegin, og vestmenningar komu ongantíð nær eftir hetta.

H71 vann 34-26 og skal spæla finalur ímóti FM-favorittunum úr Kyndli, sum longu høvdu vunnið sína hálvfinalu ímóti Neistanum.

Fyrsta finalan í SMS-deildini verður sunnudagin á Hálsi.

Kyndil javnaði

Hjá monnunum hevði H71 vunnið sær fyrimun við sigri á Hálsi, men við teprum útisigri fekk Kyndil javnað til 1-1 undan triðju finaluni sunnudagin.

Tað gekk javnt á fyri steðgin, og hálvleiksstøðan var 18-17 til heimaliðið. H71 var eisini frammanfyri við trimum, tveimum ella einum stóran part av seinna hálvleiki.

Tá 12 minuttir vóru eftir at spæla vóru hoyvíkingar frammanfyri 30-27, men Kyndil vann síðstu løtuna við seks málum ímóti einum og dystin 33-31.

Triðja FM-finalan verður á Hálsi sunnudagin, men nú er greitt, at minst tveir dystir skulu spælast afturat fyri at finna føroyameistaran.