Venjarin: Dreingirnir hildu høvdið kalt

Føroysku hondbóltsmenninir tryggjaðu sær EM-pláss við teprum sigri á Kosovo í Pristina hóskvøldið, men tað var eftir tógvið stríð.

Teir spældu ímóti einum tendraðum heimaliðið, sum spældi hart og fór heilt til markið. Tað eydnaðist kortini ikki at fáa føroyingarnir av kós, sum - hóast tað gekk striltið - hildu høvdið kalt.

 - Vit vistu, at tað fór at vera nakað heilt annað (enn á heimavølli, blaðm.), og teir spældu bæði intenst og hart og fóru til markið, segði venjarin, Peter Bredsdorff-Larsen.

Heimaliðið hevði nøsina frammanfyri stóran part av dystinum, men síðstu løtuna eydnaðist Føroyum at hála seg frammum og vinna 25-23.

 - Eg haldi bara, at tað var flott. Dreingirnir hildi høvdið kalt, og hóast tað ongantíð var lætt, vistu vit, at vit fyrr ella seinni fóru at fáa nøkur mál á rað, og tað fingu vit tíbetur eisini í seinna hálvleiki. Tað var eitt búgvið lið, sum spældi í Kosovo í dag, segði venjarin, sum nú hevur leitt Føroyar til tvey EM-endaspøl á rað.