Thor og Føroya banki fara í Hægstarætt við fiskivinnumálaráðanum

Reiðaríið Thor og Føroya banki hava fingið loyvi til at fara í Hægstarætt við Fiskivinnu- og samferðslumálaráðnum.

Talan er um djúpvatnstrolaran Phoenix, og royndarloyvi at fiska stinglaks við smámeskaðum troli.

Málið byrjaði í rættarskipanini í 2014.

Fingu ikki royndarloyvi eftir stinglaksi

Tá Phoenix fekk fíggjarligar trupulleikar í 2008 og gavst, keypti BankNordik trolaran á tvingsilssølu, og seldi Thor hann árið eftir. 

Áðrenn hann fór á tvang, hevði Phoenix saman við tveimum øðrum skipum royndarloyvi at fiska stinglaks.

Thor søkti um royndarloyvi til stinglaks fyri 2010, men Fiskimálaráðið segði nei. 

Tí stevndu Thor og BankNordik Fiskimálaráðnum. 

Krevja seks mió. kr. 

Endurgjaldskravið hjá pørturnum móti Fiskimálaráðnum var komið upp í slakar seks milliónir krónur.

Fiskimálaráðið vann bæði í Føroya rætti og í Eystara landsrætti. 

Nú hevur Procesbevillingsnævnet givið Thor og Føroya banka loyvi til at royna málið í Hægstarætti.