Yvirfriðingarnevndin fund og rundferð á Sandi í sambandi við vindmylluætlan

Yvirfriðingarnevndin hevur boðað til fundar á Sandi mikudagin í næstu viku.

Endamálið er at skoða ætlanina um sjey vindmyllur, sum skulu byggjast vestan fyri Sands bygd.

Eisini er ætlanin at gera veg úr landsvegnum millum Sand og Skopun.

Áhugað kunnu vera hjástødd

Byrjað verður á Sands bókasavni og síðani verður farið til Klivaløkshaga, har ætlanin er at byggja myllurnar, sigur Yvirfriðingarnevndin.

Øll, sum hava áhuga, vera biðin um at vera hjástødd, sigur Yvirfriðingarnevndin.

Náttúrufriðingarnevndin í Sandoyar sýslu gav fyrst í oktober í fjør loyvi til vindmyllurnar og vegin.

Fýra umsóknir

Umhvørvisstovan gav í februar felagi, sum Jóhan í Niðristovu og onnur ætla at stovna, loyvi at byggja myllurnar vestanfyri Sands bygd.

Tað er, at felagið fær loyvi til elframleiðslu úr vindorku.

Fýra umsóknir komu.

Loyvini, sum higartil eru givin, eru treytað av, at onnur neyðug loyvi eisini kunnu fáast til vegar.

Teirra millum eru loyvi frá Yvirfriðingarnevndini, loyvi frá Sands kommunu, og endalig avtala skal gerast við jarðareigararnar í økinum.