- Eg eri nøgdur við bronsuna

Jónas Isaksen rann mikukvøldið finaluna í 200 metrum hjá monnum. Hann hevi triðbestu tíð í semifinalunum, og tað bleiv eisini til eitt triðja pláss hjá unga rennaranum úr Kvívík. 

Møðin frá undanfarnu kappingunum á oyggjaleikunum hevur sett seg í kroppin hjá Jónasi. 

- Eg havi runni so nógv seinastu dagarnar, so eg eri nøgdu við úrslitið, segði Jónas Isaksen eftir at hann kom á mál. 

Hann rann teir 200 metrarnar uppá 21.75 sekund, sum er væl omanfyri hansara bestu tíð. Vinnarin Sebastiá Pons Triay úr Menorca vann við tíðini 21.52. Nummar tvey gjørdist Jamoe Oldham úr Jersey við tíðini 21.71.