Mælir til at raðfesta trygdina umborð á línubátum hægri

- Vit síggja, at vatntættar hurðar standa opnar, meðan fiskað verður, og vit síggja eisini vantandi og regluligar venjingar av bjargingarúrgerð, og tað verður gjørt ov lítið við at venja við sløkkiútgerðini.

Tað sigur Hans Johannes á Brúgv, stjóri í Sjóvinnustýrinum, sum júst nú hevur gjørt eitt eftirlitsátak, sum vísir, at trygdin á líniskipum eigur at betrast.

Eftirlitsátakið kemur sum ein beinleiðis avleiðing av syndarligu vanlukkuni við Kambi, sum sakk í fjør.

Niðurstøðan er, at hóast støðan sum heild er í lagi, so er rúm fyri ábótum.

Nøkur álvarslig viðurskifti krevja ábøtur, serliga upplæring, viðlíkahald og skjalfesting.

Hoyr innslag her:

12 skip vórðu kannað. Tey vóru Klakkur, Polarstjørnan, Núpur, Pison, Kambur, Stapin, Sandshavið, Mars, Jógvan I, Vesturhavið, Eivind og Jákup B. 

Atkomuviðurskifti, arbeiðsviðurskifti, bjargingarútgerð, vatntættleika, sløkkiútgerð, skrásetingar, vaktarhald, sertifikat, dragilúkur, happing, skelti og hvílitíð eru kannað.

Úrslitini hjá Sjóvinnustýrinum eru í frágreiðingini Átak 2024 - línuskipini, sum er á heimasíðu Sjóvinnustýrisins, fma.fo.

Sjóvinnustýrið fer aftur at kanna viðurskiftini umborð á línuskipunum í vetur.