Miðflokkurin og Framsókn hava ótrúgvar veljarar

Tey, sum valdu Miðflokkin og Framsókn á seinasta løgtingsvali, eru tey, sum eru mest sinnað at velja aðrar flokkar, var val nú.

Veljarakanningin, sum Lóður hevur gjørt fyri Kringvarpið, vísir, at 36 prosent, sum valdu Miðflokkin seinast, høvdu valt annan flokk, og 37 prosent, sum valdu Framsókn, høvdu valt annan flokk hesaferð.

16 prosent av teimum, sum valdu Framsókn seinast, høvdu valt Sambandsflokkin, og 11 prosent høvdu valt Fólkaflokkin, var val nú.

Veljarar hjá Miðflokkinum høvdu valt fleiri aðrar flokkar. Kanningin vísir, at 13 prosent høvdu valt Tjóðveldi, níggju prosent Fólkaflokkin, og 15 prosent høvdu valt Sambandsflokkin, Javnaðarflokkin og Framsókn.

Kanningin vísir, at Miðflokkurin og Framsókn høvdu aftur fingið tveir tingsessir í part, var løgtingsval nú.