Mótstøðurførar bakteriur funnar í havhestaungum

Mótstøðuførar bakteriur gera um seg í vatninum í Havnini. 

Og nú vísir tað seg eisini, at bakteriurnar eru funnar í havhestaungum.

Hetta er ein ræðandi gongd, sambært Jóhannis Danielsen, fuglafrøðingi.

Dálkað spillvatn í nærøkinum

Tað er ungin frá í ár, sum er kannaður. Hann hevur ikki etið nakað annað, enn tað sum er at finna her á leiðum.

Tí veit mann, at tað er skarn úr føroyskum øki, sum havhesturin hevur fingið niðurum. 

Og havhestaungin veit ikki betur, tá hann setur seg at pikka føði á sjónum. Tí etur hann bæði plast og skarn.

Allar leivdir fara sama stað

Í reinsibrunnum á landi verður skarn ikki skilt frá øðrum leivdum.

Hetta ger, at bakteriur liggja í brunnum og fjølga sær saman við eitt nú antibiotikaleivdum, sum tær so gerast mótstøðuførar fyri.

- Tað, sum kemur út í náttúruna, er í roynd og veru skitnari enn tað, sum verður koyrt í kloakkirnar, sigur Anni Djurhuus, lívfrøðingur og lektari á Fróðskaparsetur Føroya. 

Vit ávirka umhvørvið

Hóast Jóhannis Danielsen ikki bleiv heilt bilsin um úrslitini, var hetta nakað, hann stúrdi fyri.

- Mann blívur altíð eitt sindur bilsin um, at tað eisini er soleiðis her hjá okkum, vit eru jú lutfalsliga fá fólk, sigur Jóhannis Danielsen og leggur aftrat:

- Tað er ræðandi, hvussu stóra ávirkan vit kortini hava.