Búskaparráðið: ikki skilagott at strika MVG'ið á blæum, eplum og grønmeti

Uppskotið hjá landsstýrinum um at strika meirvirðisgjaldið á blæum, eplum og grønmeti, er ikki skilagott. 

- Vit gera eina einfalda skipan ógjøgnumskygda og tyngri at umsita, sigur Johnny í Grótinum, formaður í Búskaparráðnum.

Hoyr innslag í útvarpstíðindunum

Vandamikil glíðibreyt

At pilka við meirvirðisgjaldið á útvaldum vørum er ein vandamikil glíðibreyt, tá tað kemur til fígging av føroyska vælferðarsamfelagnum, sigur formaðurin í Búskaparráðnum.

Í lógaruppskotinum, sum liggur í tinginum, sigur landsstýrið, at uppskotið fer at kosta landskassanum okkurt um 22 mió. kr.

Uppskotið skal partvíst fíggjast við at broyta mvg-frádráttin fyri leigubilar. Landsstýrið ætlar at fáa 15 mió. kr. aftrat í landskassan við at broyta mvg-reglurnar fyri brúktar leigubilar.

At tað fer at kosta 22 mió. kr at strika mvg'ið á blæum, eplum og grønmeti, er lágt mett, heldur Johnny í Grótinum.