Avgjald í staðin fyri avlop

Avgjald skal minka kravið um avlop nógv.

Nú ætlanin er at loyva teimum, sum hava skeinkiloyvi, at innflyta rúsdrekka, verður partur av avlopskravinum hjá Rúsdrekkasøluni lagdur um til avgjald.

Avlopskravið hevur í dag sama virknað sum eitt avgjald.  

Men tí at matsstovur fáa loyvi at innflyta rúsdrekka, er neyðugt, at inntøkurnar til landskassan, sum fyrr komu sum avlopskrav, vera lagdar um til avgjald.

Neyðugt er tí at hækka avgjøldini, sigur landsstýrið. 

Lógaruppskotið er at hækka avgjaldið fyri borðvín úr 24 upp í 42 kr., og avgjaldið fyri brennivín fer úr 330 upp í 420 kr. 

Øl og sider fara at hava sama avgjald, 185 kr.

Avgjaldshækkingin verður mett at svara til lækkingina í avlopskravinum.

Í fíggjarlógini í ár er avlopskravið 20,3 mió. kr. 

Hækkaðu avgjøldini vera mett at geva 13,9 mió. kr. um árið.

Tí er neyðugt, at avlopskravið til Rúsdrekkasøluna lækkar tilsvarandi.

Prísirnir hjá Rúsdrekkasøluni hækka ikki, stendur í lógaruppskotinum.

Uppskot er eisini um, at smærru bryggjaríini fáa avgjaldslætta. 

Talan er um eina skipan, sum er kend í ES-londunum, har smærru bryggjaríini fáa avgjaldslætta upp til 50 prosent.

Tá verður lættari hjá føroyskum bryggjaríum at kappast við útlendsk, sigur Bjarni Kárason Petersen, landsstýrismaður.